കോഴിക്കോട്: പ്രശസ്ത മാപ്പിളപ്പാട്ടുകാരിയും ചലച്ചിത്ര പിന്നണി ഗായികയുമായ വിളയില് ഫസീല അന്തരിച്ചു.
63 വയസായിരുന്നു.കോഴിക്കോട് വെള്ളിപറമ്ബിലെ വസതിയില് വച്ചായിരുന്നു അന്ത്യം. മൈലാഞ്ചി, പതിന്നാലാം രാവ്, 1921 തുടങ്ങി നിരവധി സിനിമകളില് പാടിയിട്ടുണ്ട്.
മാപ്പിള ഗാനകലാരത്നം, മഹാകവി മോയിന്കുട്ടി വൈദ്യര് പുരസ്കാരങ്ങള് ലഭിച്ചു. മലപ്പുറം കൊണ്ടോട്ടി വിളയൂരിലാണ് ജനനം. വിളയില് വത്സല എന്ന പേരില് പ്രശസ്തയായി. വിവാഹത്തോടെയാണ് വിളയില് ഫസീല എന്ന് പേര് സ്വീകരിച്ചത്.
'മുഹമ്മദ് മുസ്തഫ' എന്ന ചിത്രത്തില് പിടി അബ്ദുറഹ്മാന്റെ രചനയായ 'അഹദവനായ പെരിയോനേ' എന്ന ഗാനം എംഎസ് വിശ്വനാഥന്റെ സംഗീതത്തില് ഫസീല ആദ്യമായി പാടി. സ്വദേശത്തും വിദേശത്തും നിരവധി പരിപാടികള് നടത്തിയിട്ടുണ്ട്.
ഹസ്ബീ റബ്ബീ ജല്ലല്ലാഹ്, ഹജ്ജിന്റെ രാവില് ഞാന് കഅ്ബം കിനാവ് കണ്ടു, ആകെലോക കാരണ മുത്തൊളി, ഉടനെ കഴുത്തെന്റെ, ആനെ മദനപ്പൂ, കണ്ണീരില് മുങ്ങി, മണിമഞ്ചലില്, പടപ്പു പടപ്പോട്, റഹ്മാനല്ലാ, ഉമ്മുല് ഖുറാവില്, യത്തീമെന്നെ, മക്കത്ത് പോണോരെ തുടങ്ങി നിരവധി ഗാനങ്ങളാണ് ഇവരിലൂടെ മലയാളി കേട്ടത്.
